'ഗോൾഡൻ സല്യൂട്ട്' ഐ.ആർ.ഡബ്ല്യുവിന് സാമൂഹീക പ്രതിബദ്ധതയിലൂന്നിയ ജീവിതശൈലിയുടെ ഭാഗമായി ഐ.ആർ.ഡബ്ല്യു വളണ്ടിയർമാർ കോവിഡ് 19 എന്ന മഹാമാരിക്ക് മുമ്പിൽ സധീരം സൂക്ഷ്മമായി നിലകൊള്ളുകയാണ്. ഓരോ കോവിഡ് രോഗിയുടെയും ആശ്രിതരെല്ലാം അശരണരായപ്പോൾ അഭയകേന്ദ്രമായി മാറുകയായിരുന്നു ഐ.ആർ.ഡബ്ല്യു. അവസാന നോക്ക് പോലും നിഷേധിക്കപ്പെട്ട ബന്ധുക്കളെല്ലാം ക്വാറന്റയ്‌നിൽ നിന്ന് വിലപിക്കുമ്പോൾ അനാഥമായി മോർച്ചറിയിൽ കിടന്ന മൃതദേഹങ്ങൾ അതാത് മതാചാരപ്രകാരം സംസ്‌ക്കരിക്കാൻ ഓടിയെത്തിയ സംഘം. ലോക്ഡൗൺ കാലത്ത് മരുന്ന് ലഭിക്കാതെ മരവിച്ച് കിടന്ന രോഗികൾക്ക് മുമ്പിൽ മരുന്നുമായി പ്രത്യക്ഷപ്പെട്ട നീല മാലാഖമാർ. ബന്ധുക്കളും അയൽവാസികളും ഭയവിഹ്വലരായി ഓടിയകന്നപ്പോൾ ഭക്ഷണം ലഭിക്കാതെ കരഞ്ഞ് തളർന്ന കുഞ്ഞുങ്ങൾക്കും വൃദ്ധ മാതാ പിതാക്കൾക്കും ബിസ്‌ക്കറ്റും പാലും ഭക്ഷണപ്പൊതികളുമായെത്തിയ ധീര വനിതാ പുരുഷ വോളണ്ടിയർമാർ. കോവിഡ് പോസിറ്റീവ് ആയതോടെ ഒറ്റപ്പെട്ട് തിരസ്‌കരിക്കപ്പെട്ട രോഗികൾക്ക് മുമ്പിൽ ആംബുലൻസുമായി പ്രത്യക്ഷപ്പെട്ട രക്ഷകർ. ഇവരെയാണ് കോവിഡ്കാല സേവനം മുൻനിർത്തി മലബാർ ഗോൾഡ് ആന്റ് ഡയമണ്ട്‌സും മനോരമ ഓൺലൈനും ചേർന്ന് നടത്തിയ ജനകീയ വോട്ടെടുപ്പിൽ ഗ്രൂപ്പ് ഇനത്തിൽ GOLDEN SALUTE AWARD'ന് തെരഞ്ഞെടുത്തത്.